Job 26

Iobu ia haere: Dirava ena siahu ese iseda diba bona laloa ia hereaia momokani

1Vadaeni Iobu ia haere, ia gwau,

2“Lau be goada lasi tauna momokani.
Emui durua kara lau dekenai ena namo be dahaka?
3Emui sisiba hereva, lau, aonega lasi tauna, dekenai,
ena namo be dahaka?
Diba momo lau dekenai umui hadibaia vadaeni, a?
4Daika ena durua dekena amo,
be umui ese inai hereva umui gwauraia?
Bona emui uduna dekena amo,
daika ena lauma ia hereva?

5“Mase taudia edia lauma be idia heudeheude noho,
mase gabuna, davara henunai idia noho laumadia,
ranu bona davara lalonai noho mase taudia danu.
6Badina Dirava ese mase taudia ia itaia namonamo.
Hel ena kahana ibounai,
be Dirava ese ia itaia namonamo noho,
bona unuseni noho taudia idia hunia diba lasi.
7Dirava ese mirigini kahana dekenai guba ia karaia,
gau lasi gabuna ena ataiai.
Tanobada danu be ia ese ia karaia,
gau lasi gabuna ena latanai.
8Dirava ese ori be ranu dekena amo ia hahonua,
bona ia ese ori ia hagoadaia,
vadaeni unai ranu ena metau ese ori ia makohia lasi.
9Dirava ese hua badana ena vairana ia koua,
iena ori dekena amo hua badana ia koua noho.
10Davara badana ena hetoa laini,
be Dirava ese ia karaia hagegea.
Diari bona dibura edia hetoa gabuna be unai.
11Dirava ese guba idia dogoatao du ia gwau henia neganai,
idia be mai gari danu idia heudeheude noho.
12Dirava ese iena goada dekena amo davara ia hamanadaia,
bona iena aonega dekena amo,
davara ena dagedage gauna, Rahaba ia alaia ore.
13Dirava ena lai ese guba ia hagoevaia,
bona Dirava ena imana ese,
unai koboni, gaigai dagedagena ia gwadaia mase.
Inai karadia, be Dirava dekenai kara maragidia sibona.
Inai kara be iena sivarai ena kahana maragina sibona.
To Dirava ena siahu momokani ena bada,
be daika ia diba?”
14